راولپنڈی۔10مارچ (اے پی پی):پنجاب گروپ آف کالجز راولپنڈی اسلام آبادگرلز سپورٹس فیسٹیول حفصہ ہائوس نے جیت لیا۔ فاطمہ ہائوس رنزاپ رہا جبکہ رابعہ ہائوس کی ایزا کو سال 2022ء کی بہترین اتھلیٹ قرار دیا گیا۔ گرلز سپورٹس فیسٹیول پاکستان سپورٹس کمپلیکس میں منعقد ہواجس میں جڑواں شہروں کے پنجاب کالجز کی طالبات کے درمیان اتھلیٹکس ، رسہ کشی، چاٹی ریس، سیک ریس، تھری لیگ ریس، فینسی ڈریس شو اور کلچرل سٹالز سمیت مختلف مقابلے ہوئے۔

فیسٹیول کاافتتاح مہمان خصوصی چیئرمین فیڈرل بورڈ قیصرعالم نے کیا۔ انہوں نے کھیلوں کے آغازکااعلان اورمختلف ہائوسز کے سٹالز کا دورہ کیا۔ اختتامی تقریب کے مہمان خصوصی صدر اسلام آباد چیمبر آف کامرس اینڈ انڈسٹری شکیل منیرتھے جنہوں نے نائب صدر ملک نوید اورڈائریکٹر پنجاب گروپ آف کالجز پروفیسر چوہدری محمد اکرم کے ہمراہ انعامات تقسیم کیے۔

اس موقع پر سنیئرصحافی حافظ محمداقبال، پنجاب کالجز کے پرنسپل صاحبان، اساتذہ اور طالبات کی کثیر تعداد موجود تھی۔ مہمان خصوصی صدر اسلام آباد چیمبر شکیل منیر نے طلباء وطالبات کو جدید تعلیم کے ساتھ کھیلوں کی بہترین سہولیات فراہم کرنے پر پنجاب کالجز کی انتظامیہ کومبارکباد پیش کی اورکہاکہ ہمیں اپنے کھیلوں کے میدان آباد رکھنے ہیں کیونکہ جن قوموں کے میدان آباد ہوتے ہیں ان کے ہسپتال ویران رہتے ہیں۔

ڈائریکٹر پی جی سی پروفیسر چوہدری محمداکرم نے تمام مہمانوں، اساتذہ اورطالبات کاشکریہ ادا کرتے ہوئے اس بات کااعادہ کیاکہ پنجاب گروپ آف کالجز طلباء وطالبات کوبہترین تعلیم وتربیت کے ساتھ ہمیشہ مثبت سرگرمیوں کے مواقع فراہم کرتا رہے گا۔

اسلام آباد۔10مارچ (اے پی پی):پاکستان بلائنڈکرکٹ کونسل (پی بی سی سی ) نے متحدہ عرب امارات میں ہونےوالے سہ ملکی کرکٹ ٹورنامنٹ کے لئے قومی ٹیم کااعلان کردیا ہے۔ جمعرات کو پی بی سی سی کی جانب سے جاری تفصیلات کے مطابق ایونٹ کے لئے 17 کھلاڑیوں اور 4 آفیشلز کو شامل کیاگیا ہے۔ قومی ٹیم کی قیادت نثار علی خان کریں گے جبکہ ظفر اقبال نائب کپتان ہوں گے۔

جن کھلاڑیوں کا اعلان کیاگیا ہے ان میں بی ون کیٹیگری میں ظفر اقبال، ریاست خان، محمدشاہ ذیب ، فخر عباس اورساجد نواز شامل ہیں، بی ٹو کیٹیگری میں نثار علی خان ، بدرمنیر ، مطیع اللہ ، شاہذیب حیدر ، انیس جاوید ، معین اسلم جبکہ بی تھری کیٹیگری میں محمد راشد ، فیصل محمود ،محسن خان، ثنا اللہ مروت، اکمل حیات اور اسرار الحسن کو شامل کیا گیا ہے۔

آفیشلز میں محمد ذیشان اکرم بطور منیجر، محمد جمیل کوچ، مہریوسف ہارون اسسٹنٹ کوچ اور طاہر محمود بٹ بطور ٹرینر ٹیم کے ہمراہ ہوں گے۔ سہ ملکی بلائنڈ کرکٹ ٹورنامنٹ 13 سے 19 مارچ تک متحدہ عرب امارات میں کھیلا جائے گا جس میں پاکستان ، بھارت اور بنگلہ دیش کی ٹیمیں شامل ہوں گی۔

(اے پی پی):سٹار پاکستانی وکٹ کیپر بیٹسمین محمد رضوان نے آئی سی سی مینز ٹی ٹونٹی کرکٹر آف دی ایئر 2021ءکا ایوارڈ اپنے نام کر لیا، انہیں سال 2021ءکے دوران نمایاں کارکردگی کے اعتراف میں اس ایوارڈ سے نوازا گیا ہے، انگلش بیٹر ٹامی بیومونٹ ویمنز ٹی ٹونٹی آف دی ایئر ایوارڈ لے اڑیں جبکہ اومان کے کپتان ذیشان مقصود آئی سی سی مینز ایسوسی ایٹ کرکٹر آف دی ایئر قرار پائے۔

اتوار کو آئی سی سی کی طرف سے جاری کردہ بیان کے مطابق سال 2021ءمیں نمایاں کارکردگی کا مظاہرہ کرنے والے مردوخواتین کھلاڑیوں کیلئے ایوارڈز کا اعلان کر دیا گیا، مینز ٹی ٹونٹی کرکٹر آف دی ایئر ایوارڈ پاکستانی بیٹر محمد رضوان کے نام رہا جنہوں نے سال 2021ءمیں 29 ٹی ٹونٹی میچز میں 73.66 کی اوسط سے 1326 رنز بنائے جبکہ انہوں نے وکٹوں کے پیچھے 22 شکارز بھی کئے،

اس کے علاوہ محمد رضوان گزشتہ سال کھیلے گئے ٹی ٹونٹی ورلڈکپ میں زیادہ رنز بنانے والے بلے بازوں میں تیسرے نمبر پر رہے تھے، انہوں نے چھ میچز میں 281 رنز بنائے تھے، اس کے ساتھ ساتھ رضوان نے کیلنڈر ایئر کے دوران ہزار ٹی ٹونٹی انٹرنیشنل اور مجموعی طور پر ٹی ٹونٹی میچز میں دو ہزار رنز کا سنگ میل عبور کرنے والے دنیا کے پہلے بیٹر ہونے کا اعزاز بھی حاصل کیا تھا۔

محمد رضوان نے اپنے بیان میں کہا کہ تمام ساتھی کھلاڑیوں اور کوچنگ سٹاف کا مشکور ہوں جنہوں نے بھرپور طریقے سے میری رہنمائی کی اور میں ٹیم کی فتوحات میں کردار ادا کر سکا، کرکٹ ٹیم گیم ہے اسلئے میں یہ ایوارڈ ساتھی کھلاڑیوں اور مداحوں کے نام کرتا ہوں۔ دوسری جانب انگلینڈ کی اوپننگ بیٹسمین ٹامی بیومونٹ ویمنز کرکٹر آف دی ایئر ایوارڈ لے اڑیں،

انہوں نے 9 ٹی ٹونٹی میچز میں 303 رنز بنائے۔ بیومونٹ نے کہا کہ کرکٹر آف دی ایئر ایوارڈ جیتنا میرے لئے باعث اعزاز ہے، اس ایوارڈ سے میرے اعتماد میں مزید اضافہ ہوا ہے۔ پاکستان کی فاطمہ ثنا آئی سی سی ویمنز ایمرجنگ کرکٹر آف دی ایئر ایوارڈ کی حقدار ٹھہریں، انہوں نے سال 2021ءمیں 16 ٹی ٹونٹی میچز میں 165 رنز بنائے اور 24 وکٹیں حاصل کیں۔