نیشنل ہائی وے اتھارٹی نے سوشل میڈیا پر گردش کرنے والی ایک ویڈیو فوٹیج کی وضاحت کی ہے جس میں ہکلہ-ڈی آئی خان موٹروے پر تراپ انٹرچینج کے قریب حادثات کو دکھایا گیا ہے۔ اس فوٹیج کے ردعمل میں نیشنل ہائی وے اتھارٹی(این ایچ اے)کے ماہرین نے اس سڑک کے متعلقہ حصے کا فوری معائنہ کیا جہاں حادثات پیش آئے۔ این ایچ اے کے انجینئرز کو سڑک کے ڈیزائن اور ساخت میں کوئی ایسی خامی نہیں ملی جو اس طرح کے حادثات کا باعث بنے۔ ماہرین کے مطابق بارش کے دوران تیز رفتاری کے باعث یہ حادثات ہوئے۔ نیشنل ہائی وے اتھارٹی جلد ہی اس جگہ کا مزید تفصیلی سروے اور معائنہ کرنے کا ارادہ رکھتی ہے تاکہ سڑک سے متعلقہ مسائل کو مکمل طور پر ختم کیا جا سکے۔ نیشنل ہائی وے اتھارٹی ہکلہ-ڈی آئی خان موٹروے پر سفر کرنے والوں سے درخواست کرتی ہے کہ وہ موٹروے پر رفتار کی مقررہ حد کا احترام کرنے کے ساتھ ساتھ بارش کے دوران خاص طور پر گاڑی کی رفتار کم رکھیں تاکہ اس طرح کے واقعات کے امکانات کو کم سے کم کیا جا سکے۔
