اسلام آباد۔20اگست (اے پی پی):وزیراعظم عمران خان نے پلیٹ فارم سے پھسل کر گرنے والے شخص کوبچانے والے نوجوان پولیس اہلکار کانسٹیبل جمال کلہوڑوکواعزاز دینے کا اعلان کیاہے۔جمعہ کوٹوئیٹر پرجاری ٹویٹ میں وزیراعظم نے کہاہے کہ فرض کی لگن سے سے ادائیگی پرہم نے کانسٹیبل جمال کلہوڑوکو23 مارچ کو اعزازدینے کافیصلہ کیاہے۔
وزیراعظم عمران خان نے اپنے ٹویٹ میں سورہ المائدہ کی ایک آیت’’ جس نے ایک انسانی زندگی بچائی اس نے گویا انسانیت بچائی‘‘ کا ترجمہ بھی شئیرکیاہے۔
یاد رہےکہ ایک روزقبل اپنے ایک ٹویٹ میں وزیراعظم نے ایک ویڈیو کلپ شیئر کیا جس میں دیکھا جاسکتا ہے کہ ایک نوجوان پولیس اہلکار ریلوے اسٹیشن پر اپنے فرائض کی انجام دہی میں مصروف تھا جب ایک مسافر پلیٹ فارم سے پھسل کر گرا تو نوجوان پولیس اہلکار نے تیزی سے دوڑ کر مذکورہ شخص کو ٹرین کے نیچے آنے سے بچا لیا۔
اس پر وزیراعظم نے کہا کہ فرائض کی انجام دہی انتہائی مقدس ہے۔ انہوں نے عوام کی خدمت میں مصروف نوجوان پولیس اہلکار کے جذبہ کی تعریف کی۔
