اسلام آباد۔13فروری (اے پی پی):وفاقی وزیر برائےمذہبی امور اور بین المذاہب ہم آہنگی پیر نور الحق قادری نے کہا ہے کہ رنگ، نسل، مذہب، ثقافت یا زبان کو بالائے طاق رکھتے ہوئے پرامن بقائے باہمی ‘معاہدے شہریت’ کی بنیادی اکائی ہے۔وہ مصر کے دارالحکومت قاہرہ میں اسلامی امور کی سپریم کونسل کی 32 ویں کانفرنس میں ‘شہریت کا معاہدہ اور اس کے معاشرتی اور عالمی امن کے حصول پر اثرات’ کے موضوع پر سیشن سے خطاب کررہے تھے۔

وفاقی وزیر برائے مذہبی امور اور بین المذاہب ہم آہنگی پیر نور الحق قادری نے اتوار کو قاہرہ میں سپریم کونسل برائے اسلامی امور کی 32 ویں کانفرنس میں “شہریت کی ثقافت” کے موضوع پر اجلاس کی نظامت کی۔ اس موقع پر وفاقی وزیرپیر نور الحق قادری نے کانفرنس کے موضوع “شہریت کا معاہدہ” کی اہمیت پر روشنی ڈالی۔ انہوں نے وضاحت کی کہ جامع شہریت رواداری، پرامن بقائے باہمی، تنوع اور دوسروں کو قبول کرنے پر مبنی ہے،

چاہے وہ کسی بھی نسل، مذہب، ثقافت یا زبان سے ہو۔ انہوں نے کہا کہ شہریت کا معاہدہ اسلام اور شریعت سے متصادم نہیں ہے کیونکہ اسلام اور سیرت کی تاریخ ان مثالوں سے بھری پڑی ہے ،خاص طور پر ریاست مدینہ کی شہریت کا معاہدہ جو کہ رسول اللہ صلی اللہ علیہ وسلم نے متحد ہونے، معاشرے میں امن اور سلامتی کے لیے متعارف کرایا تھا۔ پیر نور الحق قادری نے مزید کہا کہ شہریت کا معاہدہ دو اور لو تعلقات پر مبنی ہے اور فرد کو ذمہ دار بناتا ہے۔

انہوں نے نشاندہی کی کہ اس طرح کا معاہدہ آخرکار معاشرے کو پرامن بناتا ہے، اندرونی اور بیرونی خطرات سے معاشرے کا دفاع ممکن بناتا ہے۔آخر میں پیر نور الحق قادری نے کہا کہ اس مقصد کے حصول کے لیے معاشرے کے تمام اداروں سے شروع ہو کر خاندان، مکاتب، عبادت گاہیں، اداروں جیسے پارلیمنٹ اور میڈیا کو اپنا کردار ادا کرنا چاہیے اور برداشت، قبولیت کے کلچر کو عام کرنا چاہیے۔پلینری سیشن کے دیگر مقررین میں گیمبیا کے وزیر برائے مذہبی امور شیخ موسیٰ ڈرامی، فلسطینی چیف جسٹس ڈاکٹر محمود الحبش، جامعہ الازہر کے پروفیسر ڈاکٹر محمد ابراہیم ال حفناوی، جنرل موسیٰ عمر اور امام کیمرون کی کونسل کے کوآرڈینیٹر اور الامار یونیورسٹی کے ڈائریکٹر جنرل محمد عبداللہ باہ شامل تھے۔

یہ کانفرنس “شہریت کا معاہدہ اور سماجی اور عالمی امن کے حصول پر اس کے اثرات” کے عنوان سے منعقد ہوئی۔مصر کے وزیر اوقاف پروفیسر ڈاکٹر محمد مختار جمعہ جو سپریم کونسل برائے اسلامی امور کے سربراہ بھی ہیں، نے گزشتہ روز قاہرہ میں کانفرنس کا باقاعدہ افتتاح کیا۔ کانفرنس میں دنیا کے مختلف ممالک سے وزراء، مفتیوں، علماء، مفکرین اور مصنفین شامل تھے۔

کانفرنس میں ریاست کے تصور کی ترقی، سماجی معاہدے کے اندر حقوق و فرائض، مذہبی رواداری، ریاست میں خواتین کا مقام سمیت مختلف موضوعات پر بات چیت شامل ہے۔وفاقی وزیر برائے مذہبی امور اور بین المذاہب ہم آہنگی پیر نور الحق قادری نے 12 سے 13 فروری 2022 تک سپریم کونسل برائے اسلامی امور کی 32 ویں کانفرنس میں پاکستانی وفد کی سربراہی کی۔

بیجنگ۔9فروری (اے پی پی):چین نے پاکستان کے وزیراعظم عمران خان کی بیجنگ سرمائی اولمپکس کی افتتاحی تقریب میں شرکت کو بھرپور طریقے سے سراہا ہے اور کہا ہے کہ چینی شائقین کی جانب سے پاکستانی وزیراعظم اور وفد کا پرتپاک استقبال ایک بار پھر ظاہر کرتا ہے کہ دونوں ممالک کے عوام کے دلوں میں دوستی لوہے کی طرح مستحکم ہے۔

چین کی زارت خارجہ کے ترجمان زہائو لیجیان روزانہ کی بنیاد پر ہونے والی بریفنگ کے دوران بدھ کو پاکستان کی سرکاری خبر رساں ایجنسی’’ اے پی پی ‘‘کی جانب سے کیے گئے ایک سوال کے جواب میں کہا کہ ہم وزیراعظم عمران خان کی جانب سے بیجنگ سرمائی اولمپکس کی افتتاحی تقریب میں شرکت کا پرزور خیرمقدم کرتے ہیں۔

انہوں نےایتھلٹس پریڈ کے دوران وزیراعظم اور ان کے وفد کا پرتپاک استقبال کے حوالے سے کہا کہ اس سے ایک بار پھر ظاہر ہوتا ہے کہ چین اور پاکستان کے درمیان دوستی کی جڑیں عوام کے دلوں میں گہری ہیں اور اسے دونوں عوام کی حمایت حاصل ہے۔

انہوں نے کہا کہ بیجنگ سرمائی اولمپکس میں پاکستانی ایتھلٹس کا حصہ لینا اور پاکستان کے مختلف سماجی شعبوں کی جانب سے بیجنگ گیمز کی بھرپور حمایت دونوں ممالک کے درمیان باہمی تعاون کی شاندار روایات کے مطابق ہے اور اس سے پاکستان کے اولمپک جذبے کو مزید بڑھانے اور اولمپک جوش و جذبے کے عزم کی بھی عکاسی ہوتی ہے۔

ترجمان نے کہا کہ بیجنگ سرمائی اولمپکس کی افتتاحی تقریب نے دنیا کو چین اور چینی ثقافت کو دکھایا، یہ ہماری کوششوں کا حصہ ہے کہ ہم دنیا کو محفوظ اور شاندار کھیل فراہم کریں اور یہ تقریب سب کے لیے مشترکہ مستقبل کے قیام کے فلسفے کو بھی ظاہر کرتی ہے۔

انہوں نے کہا کہ ہمیں یقین ہے کہ بیجنگ سرمائی اولمپکس 2022 دوستی کے مزید پل بنانے اور چین اور پاکستان سمیت تمام ممالک کے درمیان تعاون کا ایک پلیٹ فارم بنانے میں مدد کرے گا اور پاکستان کے وزیراعظم عمران خان کی جانب سے نہ تقریب کو والہانہ انداز میں سراہا گیا بلکہ پاکستانی وفد اور ایتھلٹ کا بھی والہانہ استقبال کیا گیا۔

کنٹرول لائن کے دونوں اطراف اوردنیابھرمیں مقیم کشمیری کل بھارت کا یوم جمہوریہ یوم سیاہ کے طورپرمنائیں گے تاکہ عالمی برادری کی توجہ جموں وکشمیرپرجاری بھارت کے طویل غیرقانونی قبضے کی طرف مبذول کرائی جاسکے۔ ریاست کے بڑے حصے پربھارت کے غیرقانونی قبضے کے خلاف آزادجمو ں وکشمیرمیں احتجاجی ریلیاں اورجلوس نکالے جائیں گے۔یہ دن منانے کامقصدآزادی کی منصفانہ اوراصولی جدوجہدمیں بھارت کے غیرقانونی زیرقبضہ جموں وکشمیرکے آزادی کے متوالے عوام کے ساتھ مکمل اظہاریکجہتی کرناہے۔

آزاد جموں و کشمیر کے وزیر اعظم سردار عبدالقیوم نیازی نے تمام اضلاع کی انتظامیہ کو ہدایت کی ہے کہ ریلیاں اور اجتماعات منعقد کئے جائیں تاکہ عالمی برادری کو ایک مضبوط پیغام دیا جائے کہ کشمیری اپنے مادر وطن پر بھارت کا غیرقانونی تسلط کبھی تسلیم نہیں کریں گے۔انہوں نے تمام سیاسی جماعتوں کی قیادت، تاجروں اور سول سوسائٹی سے اپیل کی کہ بھارت مخالف ریلیوں میں بھرپور شرکت کرکے کنٹرول لائن کے اس پار مقیم مظلوم کشمیریوں کے ساتھ اظہار ہمدردی کریں۔آزاد جموں و کشمیر کے دارالحکومت مظفر آباد میں کشمیر لبریشن سیل، پاسبان حریت اور دوسری مذہبی جماعتوں کی جانب سے احتجاجی ریلیاں نکالی جائیں گی۔

ادھر کل جماعتی حریت کانفرنس کے زیر حراست نائب چیئرمین شبیراحمد شاہ نے بھارت کے کشمیریوں کے مادر وطن پر غیرقانونی قبضے کے خلاف احتجاج کے طور پر کل بھارت کا یوم جمہوریہ یوم سیاہ کے طور پر منانے کے حریت کانفرنس کے عزم کا اعادہ کیا ہے۔

 دہلی کے بدنام زمانہ تہاڑ جیل سے اپنے ایک پیغام میں انہوں نے مقبوضہ وادی میں سول کرفیو برقرار رکھنے کی مذمت کی۔